Kirkjukórinn klæddur

Frá því í haust hefur verið unnið að því að endurnýja bárujárnið á kirkjukórnum, skrúðhúsi og inngangnum bakatil.  Hér um árið þegar kirkjan var nánast endurbyggð (1997-98) þótti þessi hluti kirkjunnar heillegur.  En tíminn vann á gamla járninu sem farið var að ryðga.

Í ljós kom að viðirnir undir voru mjög heillegir, en fúi reyndar kominn í glugga og vatnsbretti.

Smiðirnir okkar þeir Guðjón Grétarsson og Atli Hermannsson stóðu í ströngu og skiluðu mjög góðu verki.  Illviðri í desember gerðu óskunda og vinnupallar létu undan, en allt hafðist þetta.

Fríkirkjan er byggð 1913, hún er friðlýst og gerð rík krafa um val á efni og frágang.  Viðhaldið var fjárfrekt eins og gera mátti ráð fyrir, en styrkur fékkst frá Húsafriðunarsjóði Minjastofnunar fyrir hluta kostnaðarins.

Í sumar er síðan stetnt að því að mála kirkjuna í heild sinni.